මම මේ කල්පනා කළේ වෛරස් එකක් ම එන්න වුණානේ අපිට ඉතිං මොළේ පෑදෙන්න.
පහුගිය අවුරුදු ගාණක් පුරා ම ලංකාවේ පොදු වැසිකිළියක දොරක සොයිබයක් කැඩුණත් ෆේස්බුක් ලයිව් ඇවිත්, එහෙම නැත්නම් රට වෙනුවෙන් කැක්කුමට අටවාගත්ත පේජ් වල පෝස්ට් ලිය ලිය මේ රට යන්න ඕනේ දිශානතිය ගැන උපදෙස් දුන්න සෙට් එකක් හිටියානේ. ඒකෙන් වැඩි දෙනෙක් හිටියේ දකුණු කොරියාව, ඉතාලිය , මැලේසියාව වගේ රටවල් වල. අර නානසාරව අත් අඩංගුවට ගත්තාම 'මෛත්‍රිපාල ! නිදහස් කරපං ඌරො අපේ හාමුදුරුවන්ව' කියලා වීඩියෝ එකක් දාලා 2016 කටුනායක දි අත්අඩංගුවට පත් වුණු සුමල් කුමාර ලක්මහ වගේ ඈයෝ හිටියෙත් මැලේසියාවේ.
දැං ඔය නානාප්‍රකාර රටවල් වල ඉන්න දේශප්‍රේමී උපදේශක බලකාය රට, ජාතිය, ආගම ගැන උපදෙස් දෙනකොට , ඒ උපදෙස් බෙදාහැරීමේ රාජකාරිය වෙනුවෙන් දක්වපු ලොකුම සුදුසුකම තමයි තමන් 'අහවල් රටේ' ඉන්නවා කියන එක. අනේ අම්මේ ! ඒ රටවල් හරි ම නීතියට වැඩය, සියලුම වැඩ හරි ම පිළිවෙල ය, කොළ කෑල්ලක්වත් බිම දමන්නේ නැතිය, රටේ ජීවත්වන මිනිස්සු ඒ සියලුම දේට ශිෂ්ටසම්පන්නව අනුගත වෙනවාය කියන කාරණා උඩ ඒ අයට ලංකාව වගේ තුන්වෙනි ලෝකේ රටකට උපදෙස් දෙන්න ඉහළම සුදුසුකම් තිබුණා. සමහර ඒවා උපදෙස්ම නෙමෙයි. අණ කිරීම් ! විධාන ! 'අපි මේ ඉතා දියුණු ජීවන තත්ත්වයක් තියෙන රටක ජීවත්වෙන ගමන්, ඒ සියලුම දියුණු සමාජ ලක්ෂණ අත්විඳින ගමන් කතා කරන්නේ, ලංකාවේ ඉන්න නරපණුවෝ , අහරකුක්කෝ ටික අපි කියන දේ අහන්න ඕනේ' කියන පණිවුඩය තමයි බොහෝ දෙනෙක්ගේ රාෂ්ට පාලන උපදෙස් වල හරය වුණේ.
අනේ ඉතිං අපිත් හිතුවා මේ අය ඔය කියන සශ්‍රීක, නීතිගරුක මනරම් කේතුමතියේ වැඩ වසලා ඒ සියලුම උසස් සමාජ රටාවන්, ආකල්ප වලින් පෝෂණය වෙලා ඇති කියලා. ඒ ඒ රටවල නීතියට හිස නමන, ඒ ඒ රජය විසින් නියම කරන බදු මුදල් ගෙවන ශික්ෂණයෙන් සහ නූතන බවෙන් පිරුණු රටවිරු බලකාය ! අපි එහෙම හිතුවා.
ඒ අස්සේ ලෝකයටම කොරෝනා උවදුර ආවා. වෙන රටවල් වල හිටිය අයට ආපහු මෙහෙට එන්න වුණා. හදිසි උපද්‍රව තත්ත්වය මත රටේ නීති රීති වෙනස් වුණා. මෙන්න යකඩෝ අර රටවල් හදන්න බණ කියපු උදවියගේ වෙස්මූණු ගැලවිලා වැටුණා. ඉන්න රටවල් වලින් පනවන දහසක් නීති වලට හිස නමාගෙන ඉන්න අය ලංකාවේ නීතියට කටින් ගහලා දිනන්න බැලුවා. නීතියට අවනත වෙන්නේ නෑ කියලා අභියෝග කළා. තවත් සමහරු නීතියට අනුගත නොවී කට්ටි පැන්නා. නිරෝධායනය නොවී කට්ටි පැනලා නිකං හිටියේ නැහැ. ලෙඩේ බෝ කර කර ලංකා සවාරි ගියා. කොරෝනා වැළඳිලත් භාර නොවී හිටියා. ඒ අස්සේ නිරෝධායනය නොවුණු තව එකෙක් ඉතාලියේ ඉඳන් ආපු බව වසං කරලා පපුවේ අමාරුවක් කියලා රෝහල්ගත වෙනවා. හැදිලා තියෙන්නේ කොරෝනා නිසා වාට්ටුවේම රෝගීන්ගේ සහ වෛද්‍ය කාර්‍ය මණ්ඩලයේ සෞඛ්‍ය තත්ත්වය අනතුරේ හෙළනවා. නිරෝධායනය නොවී පැනලා ආපු උන් නිසා පොලිස් ඇඳිරි නීතිය පවා දාන්න වෙනවා.
ආන්න දැං අපිට තේරෙනවා; මෙච්චර කාලයක් තිස්සේ මේ අය කරලා තියෙන්නේ අති විශාල රඟපෑමක් ය කියන එක. ලංකාවේ මොන මළදානයක් හරි වුණ ගමං 'අපි ඉන්න රටේ නම් කරන්නේ මෙහෙමයි' කියලා අපේ නැට්ට තවමත් ඉතුරුවෙලා තියෙන එක ගැන විස්මයෙන් වගේ අදහස් පල කළාට ඒ අයගේ නැට්ටත් තවම කපලා නැති බවත්, හදිසියක් වුණු ගමං අර ඇඳුම් ඉරාගෙන නැට්ට වැනෙන බවත් ඔප්පු වෙන්න කොරෝනා වගේ වෛරසයක් ම එන්නම වුණා.
දැන් නම් රට ජාතිය ගැන ෆේස්බුක් ලයිව් එකක් දාන්න හිතෙන තරමට මාර ආඩම්බරයක් දැනෙනවා
0 comments:
Post a Comment