අපේ ඔෆිසියේ තේ බෙදන්නේ ජැමෙයිකන් ස්ප්‍රින්ටර්ස්ලා ය



කොහොම වුණත් දැන් තමා අපේ ඩිපාර්ට්මන්ට් එකට නමටම ගැලපෙන තාලේ ටී ගර්ල් කෙනෙක් ලැබිලා ඉන්නේ. කලින් හිටියා චම්පා , කමලා , නයනා , බානුමතී , සඳරේඛා වගේ නානාප්‍රකාර අය. ඒ මිස්ලා තේ බෙදනවාට අමතරව සමහන් හදලා දුන්නා . ඇඹරෙල්ලා ගෙඩි දෙකක් දුන්නාම ඒකෙන් අච්චාරු හදලා හැටකට බෙදලා ගිනස් වාර්තා තිබ්බා. ඊට අමතරව එයාලා හෙණ ෆෙමිනිස්ට්ලා. කවුරුහරි එයාලට විතරක් ගෙනත් දෙන කිරි අම්මලාගේ දානයක කැවුම් පාර්සලේ , බිල්ඩින් එකේ ලේඩීස්ලා විතරක් තෝර තෝර පොඩි කෑල්ලක් හරි බෙදලා දෙනවා. අනේ අපි සැලෙයි ඕවාට. 

අපේ IT ඩිපාර්ට්මන්ට් එකට දාලා ඉන්නේ ජැමෙයිකානු කෙටිදුර සංචිතයෙන් අයින් කරපු මිස්ලා දෙන්නෙක්. ඒ අය රිලේ එකේ දි බැට්න් එක කාටවත් ම නොදී ඒකත් අරගෙන පිට්ටනිය වටේ ම දුවපු නිසා ලු එයාලව අයින් කළා කියන්නේ. කොහොම හරි ඔන්න ඒ දෙන්නා කොයි වෙලාවේ බැලුවත් තේ බන්දේසි අරගෙන IT ඩිපාට්මන්ට් එක පුරා දුවනවා පේනවා. නිකමට හිතන්න ! දෑත බදලා අල්ල ගත්ත බන්දේසියකට තේ කෝප්ප හැත්තෑවක් විතර දාගෙන ඒ එකක්වත් කාටවත් නොදී පැයට සැතපුම් අසූවක වේගෙන් එහාට මෙහාට දුවනකොට. ස්ටාෆ් එකත් දවස තිස්සේම එයාලා පස්සේ දුවනවා. ඉතිං අර මිස්ලා කණු වලට කබඩ් වලට වසන් වෙවී ආයෙම අනික් අතට දුවනවා. අන්තිමට ස්‍ටාෆ් එකට හති වැටිලා වැඩේ අල්ලලා දැම්මාට පස්සේ තමයි මිස්ලා තේ එක මේසේ උඩින් තියන්නේ. එතකොට උණු තේ, කෝපි එහෙම අයිස් ටී, අයිස් කොෆී වෙලා තමයි ලැබෙන්නේ. ඒත් කොහොම හරි ලැබුණ එකම මදි ද ?

ඒකටත් එක්ක දැන් අපිට ඉන්න ටී ගර්ල්. එයාගේ නම 'දුර්ගා'. නමේ හැටියටමයි වැඩ. එයා ඈතින් එනකොට අපිට පේන්නේ දේවතාවියක් එනවා වගේ. ඉතිං අපි තේ , කිරි තේ , සීනි නැති තේ , ග්‍රීන් ටී ඉල්ලලා කන්නලව් කරනවා. යහපත් චර්‍යාවකින් හිටිය නරපණුවන් ට දුර්ගා දේවියගේ බැල්ම වැටිලා ඉල්ලපු දේවල් ලැබෙනවා. අනික් අයට මොකුත් ම නෑ. ඉතිං ඒ අය නැවත නැවත කන්නලව් කළාම දුර්ගා ගේ හිත උණු වෙලා ඉක්මණට මොකක් හරි එකක් ගෙනත් තියනවා. දුර්ගා දේවිය පූජාවට තියෙන ඉඟුරු බිස්කට් , ලෙමන් පෆ් , චොකලට් බිස්කට් වලින් බැතිමතුන්ට දමා ගහනවා. එපා කියනකොට බිස්කට් හතරක්ම තියනවා. කන්නේ නෑ කිව්වොත් තියන්නේ දෙකයි. කෙම්මුර දවසට සමෝසා දෙන්නේ නම් සලාකෙට. 

මම නම් දුර්ගා දේවියගේ කීකරු බැතිමතෙක්. කොච්චර ද කියනවා නම් හිනාවුණත් ඇති , 'තව තේ එකක් ඕනෙද ?' කියලා අහනවා. 

අන්න දේවතාවියෝ !!! අපිට බෑ ස්පයික්ස් දාගෙන ටී මිස්ලා පස්සේ පන්නන්න. විඛාර ! 
Share on Google Plus

About Kaseera

ලිවීම වනාහී මාගේ ප්‍රහර්ෂය යි. ලිවීම වගකීම් සහගත වුවද යුතුකමක් යැයි මා නොසිතමි. මම ලියන්නේ මා වෙනුවෙන් ම බවත් ආත්ම තෘප්තිය උදෙසා බවත් පැවසීමට හැකිය. නුමුදු ඔබ ද ඒවා කියවන බව දනිමි. එබැවින් මෙසේ පවසමි. මාගේ ප්‍රහර්ෂය උපදින්නේ ලිවීම තුළිනි.
    Blogger Comment
    Facebook Comment

2 comments:

  1. I always like your writing style. Keep it up.

    ReplyDelete
  2. Ada post eka harima rasawath!Pinthureth ekata apooruwata galapenawa.

    ReplyDelete