නැත ලොවේ අන් රසඳුනා - ආදරේ සේ සුව දෙනා

කිරීටයට උරුමකම් කියන රාජකීය ධූරාවලියේ සයවැන්නා වන හැරී කුමරු ඇමරිකානු නිළියක වන මෙගන් මාකල් සමග විවාහප්‍රාප්ත විය. මෙගන් මාකල් හැරී කුමරුට වඩා වයසින් වැඩි , පෙර විවාහයකින් දික්කසාද වූ කාන්තාවක වීම මේ දිනවල වඩාත්ම කතා බහට ලක්වන උණුසුම් පුවත වී ඇත.

හැරී කුමරුට පෙර මෙලෙස වඩාත්ම කතා බහට ලක් වූ ආන්දෝලනාත්මක විවාහ තීරණය ගනු ලැබුවේ 8 වැනි එඩ්වඩ් රජු ය. එංගලන්තයේ රජු ලෙස පදවිප්‍රාප්තියෙන් මාස 11  දවස් 21 ක් ගත වන තැන කිරීටය අතැර යන ඔහු දෙවරක් විවාහව නීතියෙන් වෙන් වූ වැලීස් වෝෆීල්ඩ් - සිම්ප්සන් නම් ඇමරිකානු කාන්තාවක විවාහ කර ගත්තේය. එඩ්වර්ඩ් කුමරු ගේ අනුප්‍රාප්තිකයා ලෙස රජ වූයේ ඔහුගේ බාල සොහොයුරු වූ හයවැනි ජෝර්ජ් රජුය. එනම් වත්මන් එලිසෙබෙත් රැජණ ගේ පියාණන්ය.

1936 වසරේ දී එඩ්වර්ඩ් කුමරු ප්‍රේමය වෙනුවෙන් රජ කිරුළ අත හැරීම එවකට යටත් විජිතයක් වූ ලංකාවට ද දැනී තිබුණු පුවතකි. සිබිල් වෙත්තසිංහයන් තම " වැනියන් කළු වැනීයන්" පොතෙහි සඳහන් කරන ආකාරයට ඇගේ ළමා කාලයේ ප්‍රධාන සන්නිවේදන මාර්ගයක් වූ කවි කොළ කරුවන් එම පුවත ශෝක භරිතව කඳුළු සලමින් කවියෙන් විස්තර කර තිබිණ.

"සිම්සන් නෝනා ආදරී
හිතට බොහොම වී පිරී
දෙයියනෙ හිතට බොහො දුකයි
ආලේ ලීලේ ඒ තමයි"

තිහේ දසකයේ කවි කොළ කරුවන් ලේන්සුවෙන් නාසය සූරමින් කම්පා වූ මේ පුවත අසූව දසකයේ රූපවාහිනියට ගෙන එන්නේ ටයිටස් තොටවත්තයන් විසින් සිංහල හඬ කැවූ " දොස්තර හොඳ හිත" නාටකයේ එන ලා තණකොළ පෙත්තාස් සංගීත කණ්ඩායමේ ගීතයක් ඔස්සේය. " ලව් ලව් ලව් ලව් " නම් වූ එම ගීතය හරහා ප්‍රේමකීර්ති ද අල්විස් නම් වූ කුසලතාපූර්ණ ගීත රචකයා ඉදිරිපත් කරන්නේ තරමක් විකාරරූපී මතවාදයකි.

" ආලය කියනා මාලය වැටුණොත් රජුන් ද පිස්සන් වෙයි
අටවැනි එඩ්වඩ් රජකම ඇරියේ ආලය හින්දාමයි"

අට වැනි එඩ්වඩ් තම සිත් දිනූ යුවතිය වෙනුවෙන් රජකම අතැර ප්‍රේමය පිළිබඳ ඉඟියක් ලබා දේ. නමුත් කවිකොළයේ සිට රූපවාහිනිය දක්වා වූ අපේ නිර්මාණකරුවන් එය භාරගන්නේ ශෝකී සිදුවීමක් හෝ උමතු තීන්දුවක් ලෙසය.

හිරු නොබසින අධිරාජ්‍යයේ රජකම එපා යැයි පවසා තමාට උවමනා වූ ගැහැණිය තෝරාගත් එඩ්වඩ් රජු පිස්සෙක් ලෙස අරුත් ගැන්වෙන ලාංකේය නිර්මාණ සාහිත්‍ය තුළම ජෝන් එෆ් කෙනඩි වැන්නෙක් උත්කර්ෂයට නැගෙන්නේ පරමාදර්ශී චරිතයක් ලෙසිනි. වෙඩි පහරින් මොළය විසුණුව ප්‍රාණය අවසඟ වන මොහොතේ සිය බිරිඳ ජැකලීන් ගේ උකුළට කඩා වැටුණද ඔහු අතීතය පුරා නානාවිධ පෙම් ජාලාවන් හි පැටලී බොහෝ ප්‍රශ්නාර්ථ රැසක් ඉතිරි කළ අයෙකි. සුමිත්‍රා රාහුබද්ධයන් ගේ "ඉටිපහන්" නවකතාවට අනුව 1963 දී ජනපති කෙනඩි ව ටෙක්සාස් හි දී ඝාතනය කළ විට ලංකාවේ පුවත්පත් වල ශෝක කවි පළ වන්නේ "අයියෝ කෙනඩි - අයියෝ රත්තරන් කඳ " යනුවෙනි.

රජ මැදුරෙන් මහ පොළවට නික්මීම අපට අලුත් පුවතක් යැයි නොසිතෙන්නේ සරච්චන්ද්‍රයන්ගේ "සිංහබාහු" නාටකය සිහි වීමෙනි. සුප්පා දේවිය මෙසේ ගයන්නීය.

" වගු රට නරනිඳු - දඹදිව පරසිදු
හට දා වූ මම වෙමි දෙටු දූ
සරණ ගිය සිහ සමිඳුනේ
සමඟ වෙසෙමිය ගිරි ලෙනේ "

සුප්පාදේවිය සිංහයා සමග විවාහ වී ලබන පුත් කුමරුන් වන්නේ සිංහබාහු ය. සිංහබාහු ගේ පුත් කුමරු වූ විජය ලංකාවට ගොඩ බසින්නේ තම්මැන්නාවෙනි. රජ සම්පත් අතැර සිංහයෙක් සමග වනවැදි සුප්පා දේවියට කියන්නට තවත් දෑ තිබිණ.

"ලෝ දහමින් වැදෙනා රළු පහරින්
ගත සිත රිදෙනා කළ නිතියෙන්
නැත ලොවේ අන් රසඳුනා
ආදරේ සේ සුවදෙනා "

සුප්පාදේවිය නොදකින දුරෙක ; එඩ්වඩ් කුමරු හෝ හැරී කුමරු දකින තැනෙක බයිබලය නමින් දෙයක් ඇත. එහි කොරින්ති 13:1-7, 13 යටතේ මෙසේ සඳහන් වේ.

"ප්‍රේමය, සියල්ල උසුලයි. ප්‍රේමයෙහි, විශ්වාසයට ඉමක් නැත, බලාපොරොත්තුවට නිමක් නැත, ඉවසීමට අගක් නැත "

Share on Google Plus

About Kaseera

ලිවීම වනාහී මාගේ ප්‍රහර්ෂය යි. ලිවීම වගකීම් සහගත වුවද යුතුකමක් යැයි මා නොසිතමි. මම ලියන්නේ මා වෙනුවෙන් ම බවත් ආත්ම තෘප්තිය උදෙසා බවත් පැවසීමට හැකිය. නුමුදු ඔබ ද ඒවා කියවන බව දනිමි. එබැවින් මෙසේ පවසමි. මාගේ ප්‍රහර්ෂය උපදින්නේ ලිවීම තුළිනි.
    Blogger Comment
    Facebook Comment

1 comments:

  1. The wedding speech was fantastic which was done by the American priest. The royal family didn't appriciate his point I guess but he made me realize everything in this world should be up to date even royal culture. We all have to go with it. The Bishop mentioned the real meaning of love..and how does it have an impact on earth.

    ReplyDelete