චයිනමන් : ප්‍රදීප් මැතිව් සොයා යාම


එය ප්‍රතීපන් සිවනාදන් මැතිව් නොහොත් ප්‍රදීප් මැතිව් සොයා යන ගමනය. වරෙක 1983 රාජකීය - සාන්ත තෝමස් මහා ක්‍රිකට් තරගයෙන් රාජකීයයන් ජයග්‍රහණය ලැබූ කූටෝපක්‍රමයක හෙළිදරව්ව ය. විටෙක එය ක්‍රිකට් ඉතිහාසයෙන් වළලා දමන යටගියාවක සුන්බුන් ඇට කැබිලිති හාරා ගොඩ දමයි. වමතින් සහ දකුණතින් වේග පන්දුත් , දඟ පන්දුත් යැවූ , පසුව මීදුමක් සේ අතුරුදන් වූ , අතුරුදන් වන්නට කැමති වූ පුරාවෘත්තයක් පසු පස හඹා යයි. රූමත් , තරමක් රූමත් සහ සිත් බඳනා තරුණියන් ගේ ප්‍රේමාරවුල් අතර පැටලී යයි. චයිනමන් කතා කරන්නේ ක්‍රිකට් ගැනය. නමුත් එහි නැත්තේද ක්‍රිකට්දැයි සැක සිතෙන තරමට රසවත් ය. කුහුල් සහගත ය. අවුල් ඇතිකරවන සුලුය.

ශෙහාන් කරුණාතිලක ඉංග්‍රීසි බසින් රචිත "චයිනමන් " කෘතියේ ග්‍රන්ථ නාමයට සමීපයෙන්ම "ප්‍රදීප් මැතිව් ගේ ක්‍රිකට් ප්‍රවාදය' නමු වූ උද්ධෘතයක් ද වේ. 2012 වසරේ පොදු රාජ්‍ය මණ්ඩලයීය ග්‍රන්ථය ලෙසත් , දකුණු ආසියානු සාහිත්‍ය සඳහා වන ත්‍යාගය මෙන්ම ග්‍රේෂන් ත්‍යාගය , දිනූ "චයිනමන්" සිංහලයට නගන්නේ දිලීප අබේසේකරය. පිටු 325ක් පුරා ඉතා කුඩා , වෙහෙසකර අකුරුද එපමණක්ම නොව කිසිම හැඩයක් නැති දළ රූප සටහන් අතර දිව යන කතාන්දරය අතිශය සිත් ඇදගන්නා සුළුය. ඔබ මා මෙන්ම ක්‍රිකට් වලට පෙම් නොබඳින්නෙකු විය හැකිය. නුමුදු මේ කතාව ක්‍රිකට් පිටියක සිරවී නොතිබෙන දසත සිසාරා පැතිරෙන කතා ප්‍රවාහයකැයි වටහා ගන්නට පළමුවැනි පිටු 50 කියවීම පමණක් සෑහේ. එතැන් සිට ඔබ වද වන්නේ ක්‍රිකට් පිළිබඳව ඔබගේ අල්ප හෝ ශූන්‍ය වූ දැනුම පිළිබඳ නොව , කතුවරයාගේ දැනුම සහ පූර්වාපර සිදුවීම් වල ගැලපීම පිළිබඳවය. ඔහුගේ ගවේෂණාත්මක තොරතුරු වල ඇදහිය නොහැකි නිරවද්‍යතාව සහ යෝග්‍යතාව පිළිබඳවය .

ශෙහාන්ගේ ලිවීමේ රටාව විටෙක සිහියට නගන්නේ "රොහින්ටන් මිස්ට්‍රි" ගේ "A Fine Balance" කෘතියයි. විවිධ දිශාවන්හි විහිදුණු , විවිධ කාලයන්ට අයත් සිදුවීම් මනාව ගලපන මිස්ට්‍රි ගේ සංයමය ශෙහාන් තුළ නැත. විකට්ටුව උදුරා අහසට ඇද දමන මැල්කම් මාර්ෂල් ගේ බිහිසුණු වේග පන්දුවක් මෙන් චයිනාමන්හි සියලුම සිදුවීම් සුණු විසුණු කර අවුල් කර දමන ශෙහාන් කරුණාතිලක අපට බල කරන්නේ ඒවා අසුලාගෙන පිළිවෙලකට තබා කියවීමටය. පුදුමය වන්නේ ශෙහාන් ටත් දිලීපටත් ඒත් මදි නම් ප්‍රදීප් මැතිව්ටත් කුද ගසා ගන්නැයි කියා පොත විසිකර දමන්නට නොසිතීම ය . චයිනාමන් තුළ ඇති වාජීකරණ බලය ඒ කුඩා අකුරු කෙරෙහි නැගෙන නොරිස්සුම ද ප්‍රේමයකට පරිවර්තනය කරන්නට සමත් ය. තරග පාවාදීම් , ක්‍රිකට් පාලක මණ්ඩල අවුල් වියවුල් , ක්‍රීඩකයින් අතර ඇති තරගකාරීත්වය , ඔට්ටු දමන්නන් , බුකී කරුවන් , පාතාලය සහ තනි නොතනියට එල්.ටී.ටීය ද සිටින චයිනාමන් විටෙක අරාබි නිසොල්ලාසය බඳුය. එය මොරටුවේ කුරේ පාර්ක් එකෙන් ද , ටිරෝන් ප්‍රනාන්දු පිටියෙන් ද නොසෑහී ලොව වටා ක්‍රීඩා පිටි ද සමාජ ශාලා ද , රූ රැජණ තරග අතර ද නිදහසේ පා වී යන්නේය. 

ප්‍රදීප් මැතිව් සොයා ගන්නට නම් ඔබ ද ඒ පසුපසම යා යුතු ය. සහතික වන සත්‍යයකි. ඔබ ඔට්ටුපාලු බෝලයකින් වත් ක්‍රිකට් ගසා නැති වීමට පුළුවන. අඩුම තරමේ එක් පන්දුවාරයකට ඇති පන්දු සංඛ්‍යාව නොදන්නවා විය හැකිය. නමුත් ප්‍රදීප් මැතිව් සොයා යන ගමන ඔබට කිසි ලෙසකින් හෝ කම්මැලි එක විය නොහැකිය, එය එතරම් මාර ය.
Share on Google Plus

About Kaseera

ලිවීම වනාහී මාගේ ප්‍රහර්ෂය යි. ලිවීම වගකීම් සහගත වුවද යුතුකමක් යැයි මා නොසිතමි. මම ලියන්නේ මා වෙනුවෙන් ම බවත් ආත්ම තෘප්තිය උදෙසා බවත් පැවසීමට හැකිය. නුමුදු ඔබ ද ඒවා කියවන බව දනිමි. එබැවින් මෙසේ පවසමි. මාගේ ප්‍රහර්ෂය උපදින්නේ ලිවීම තුළිනි.
    Blogger Comment
    Facebook Comment

0 comments:

Post a Comment