සේපාලි මායාදුන්නේ ගේ 'දෙබෙදුම' නවකතාව ආයෙත් වතාවක් කියවන්නට හිතුණා. ඒ 1993 අවුරුද්දේ ප්‍රශස්තම නවකතාව විදියට ඩී.ආර්. විජේවර්ධන සම්මානය දිනපු නවකතාව. ඉතිහාසය පුරා ම විජේවර්ධන සම්මානය දිනූ සහ නිර්දේශ වුණු අනිත් කෘති බොහෝමයක් රසවත් වුණත් සර්වකාලීන කියවීමක් සඳහා පොළඹවනසුලු බවින් අඩුයි. කම්මැල්ලවීරගේ 'අට අවුරුද්ද' කිරිවත්තුඩුවගේ 'ඉසුරු සොයා' සුනේත්‍රාගේ 'සඳුන්ගිර ගිනි ගනී' වගේ කෘති වල ප්‍රස්තුතය සමකාලීන යුගය සමග දැඩිව බැඳිලා තියෙනවා. ශාන්තිගේ 'වරා මල්' දැන් කියවනකොට ඒ කතාවේ තියෙන ශාන්තිමය මුහුණුරෙන් ගැලවෙන්න පාඨකයාට බැහැ.
නමුත් සේපාලිගේ 'දෙබෙදුම' නවකතාව නුවර කලාවිය ජනජීවිතය ඇසුරෙන් පරම්පරා ගැටුම දෙස බලන නූතනවාදී කෝණය අදටත් විස්මය දනවනසුලුයි. පෙරවදනේ සඳහන් වන විදියට සේපාලිගේ අම්මා කියන්නේ උතුරුමැද පළාතේ පළමුවන විවාහ, උප්පැන්න සහ මරණ ලේකම්වරිය. මහලු අවිවාහක ජෝඩු පණහ - සියය එකවර විවාහ කරවන විට ඒ උත්සව වලට අම්මාගේ අතේ එල්ලීමැදගම , පුල්එළිය, විරාමුරුක්කුව, මළමිරියාගම වගේ ගම්මානවල ඇවිදලා ලද නොමියෙන මතක තමන්ගේ හිතේ තැන්පත් වෙලා තියෙනවා කියලා ලේඛිකාව සඳහන් කරනවා.
නුවර කලාවියට නූතනත්වයේ සෙවණැල්ල වැටෙනකොට සුපුරුදු ගම්බද ජීවිතය හැල හැප්පීම් වලට මුහුණ දෙන ආකාරය දෙස උපේක්ෂාවෙන් බලන සේපාලි පෙරවදනේ මෙහෙම ලියනවා.
'මෙයින් වර්තමාන පරපුර පැරණි නොකිලිටි ගැමි පරපුරට හාත්පසින්ම බැහැර වූ පුහු ගතිසිරිත් කරපින්නා ගත්තවුන් යයි බොහෝ දෙන ඇදහූව ද යුග දෙක තුළ ම ජීවත් වූවන් හොඳ තරමට ම එකසේ ම නරක යයි එදා සේම අද ද මගේ සිත තුළ ට ඇතුළු වී තිබෙයි. ඒ නිසා ම පරම්පරා ගැටුම පිළිබඳව ලියැවෙන බොහෝ නිර්මාණවල මෙන් පැරණි පෙළ සාරධර්ම හා ඒවා කෙළෙසා ගත් නූතන පෙළ පිළිබඳව මගේ නවකතාවට ඇතුළත් නොකළෙමි. ඒ ඔවුන් සියල්ලන්ම එකසේ ම හොද මෙන්ම නරක ද හෙයිනි.'
'දෙබෙදුම' නවකතාවේ අන්තිම පිටු දෙකේ දී පිංචි තමන්ගේ මාමණ්ඩිය සහෝදරා ට කරන දෝෂාරෝපණය ඇතුළේ ලේඛිකාවගේ සමස්ත ජීවනාදර්ශය ම කැටි වෙලා තියෙනවා. තුට්ටු දෙකේ සෝප් ඔපෙරා නිළියගේ ඉඳන් සැළලිහිණියෙක් ගිල්ලාක් බඳුව කෑ ගසන පීචං ගායිකාව වෙනකං රූපවාහිනියේ , පුවත්පත්වල මන්තරයක් වගේ ජප කරන 'අලුත් පරම්පරාව කමකට නැහැ. අපේ කාලේ වගේ නෙමෙයි' කියන යල් පිනූ නන් දෙඩවිලිත් එක්ක සේපාලි මායාදුන්නේ කියන ලේඛිකාවගේ චින්තනය ගැන ගෞරවයක් ඇති වෙනවා. දුටුව හැම මොහොතකම අඳුරු පැහැති ඔසරියකින් සැරසී හිටිය, සමාජශීලි නොවන තරමක් තද බැල්මකින් යුතු වුණු ඇය ඇතුළේ තිබුණු නවීන සිතිවිලි ගැන මවිතයක් ඇති වෙනවා.
'දෙබෙදුම' නව කියවීමකට පෙළඹවීම ඇති කරවනවා.
0 comments:
Post a Comment