එක් පෙති මලක් විය


ඒ මනෝරම්‍ය ප්‍රේමයෙහි පීතෘ පාර්ශවය මම වන්නෙමි. ඔබ බොහෝ වේදනා,විළි ලා අපගේ ප්‍රේමය බිහි කළෙහිය.අද වන ඔබ මා සමීපයෙන් දුරස්ව ගොසිනි.එසේ වූ පමණින්,ප්‍රේමයෙහි මාතෘ පාර්ශවය දුරස් වූ පමණින්, ඔබ මා එක්ව බිහි කළ ප්‍රේමය මරා දමන්නට තරම් මා අකාරුණිකයෙක් යැයි ඔබ සිතන්නේද 

එක් පෙති මලක් විය නුඹ මගෙ අත් දෙකට
නෙළා නොගත්තේ මගෙ බෝසත්කමට
හැරගිය දිනේ නාවත් මා ගම් දොරට
ආවේ ඇයිද විරහී සිත අද්දරට 

ප්‍රේමය අත්පසුරෙන් වැළැඳ ගන්නා දුරක තිබෙන තුරු බෝසත් චරිතයන් අරුම නොවේ. නමුත් ආලවන්තකම් මිටින් ගිලිහී යද්දීත්,සත් සමුදුරින් එහා කොදෙවුවකට ඇදී යද්දීත්, ඒ බෝසත් චරිතය තව දුරටත් ජීවත් වන්නේ නම්, එතැන සැබෑ ප්‍රේමය තිබේ යැයි මා තරයේ අදහමි. "හුලවාලි" කතා පුවතේ "බිබිලේ ඇත්තන්"ට තම පෙම්බර බිරිය දන් දුන් හැඩිදැඩි "දාරා" පවා වටහා ගත් ස්ත්‍රී - පුරුෂ ප්‍රේමයේ යථාර්ථය එය නොවේද ?

ආලවඩන අකුරු පහේ තේරවිල්ල සකී
රෑට නිදන තනි පැදුරේ නැති හීනෙකි සකී
ආලෙ බිඳුණු දා කුමකට කඳුළු හෙළනු සකී
ආලවඩන යන තේරුම බෝසත්කම සකී

සෙනෙහසේ වරපටින් ඔබව ඇඳ , බැඳ තබා ගන්නට නොවෙහෙසෙමි. ඔබ තව දුරටත් ඒ ප්‍රේමය තුළ යමක් නොදකිනවා විය හැකි නමුත් මා අදටත් ඒ ප්‍රේමය තුළ ජීවිතයේ ආනන්දය සොයමි.ඉදින්, ඔබ ඔබේ ලෝකයේ දොරටු විවර කර ගන්න. අවසර ඇත්තේ නම් පමණක් ඒ ලෝකයේ කවුළුවකින් මගේ ලෝකය වෙතඑබී බලන්න.දකින්න - ඔබත්,මාත් එක්ව බිහිකළ ප්‍රේමයේ බිජුවට මා තවමත් උණුසුමින් රැක බලා ගන්නායුරු ....

සිටිනා කොදෙව්වක නුඹ සැප විඳි නම්
මවෙතින් ලැබුණු ආදරයත් ලැබේ නම්
මතකය නුඹට හිරිහැරයක් නොවේ නම්
තව කුමකට ද දුක් ගී කල්පනාවන්

ප්‍රේමය,ප්‍රේමයම විනා වෙන කිසිම දෙයක් වන්නට බැරිය. එසේ නම් ඔබ මා සතු නොවූ පමණින් ඒ ප්‍රේමය මියැදෙන්නට කොහොමත් බැරිය. ඔබ ලොවේ කොතැනක සිටින්නේදැයි මා නොසොයමි. ඔබ සිටින්නේ කා සමගදැයි මා නොඅසමි. පෙම් සිතිවිලි වලට එසේ අසුරු සැණින් මියැදෙන්නට හැකි නම් සෑම මිනිස් සිතක්ම ප්‍රේමයේ සොහොන් කොත් පිරී ඉතිරී ගිය සුසාන භූමියක් වනු නිසැකය.

එක් පෙති මලක් විය නුඹ මගේ අත් දෙකට
නෙලා නොගත්තේ මගෙ බෝසත් කමට
හැරගිය දිනේ නාවත් මා ගම් දොරට
ආවේ ඇයිද විරහී සිත අද්දරට           

විස්මිත ගමට අදහන්නට බෑ තවම
මා හැර දම නුඹ ගිය මග ගැන අරුම
සතු කරගන්න මුල් පෙම නොපිදූ බැවින
දුක්බර හිතට කීවෙමි නොහඬන ලෙසට

සිටිනා කොදෙව්වක නුඹ සැප විඳී නම්
ම වෙතින් ලැබුණු ආදරයත් ලැබේ නම්
මතකය නුඹට හිරිහැරයක් නොවේ නම්
තව කුමකටද දුක් ගී කල්පනාවන්

ගායනය      : රොහාන් ශාන්ත බුලේගොඩ
පද රචනය  : බන්දුල නානායක්කාරවසම් 
සංගීතය      : ජගත් ජයවර්ධන





Share on Google Plus

About Kaseera

ලිවීම වනාහී මාගේ ප්‍රහර්ෂය යි. ලිවීම වගකීම් සහගත වුවද යුතුකමක් යැයි මා නොසිතමි. මම ලියන්නේ මා වෙනුවෙන් ම බවත් ආත්ම තෘප්තිය උදෙසා බවත් පැවසීමට හැකිය. නුමුදු ඔබ ද ඒවා කියවන බව දනිමි. එබැවින් මෙසේ පවසමි. මාගේ ප්‍රහර්ෂය උපදින්නේ ලිවීම තුළිනි.
    Blogger Comment
    Facebook Comment

0 comments:

Post a Comment